رباعيات ودشورانى

غاب نجـــــم النَطِح والحر علينا إشتدَ
ضَيـَّـقـْنـا وقِصر لَيلُو ونهــــارُوْ إمتدَّ
نَظِرة المنــــُّو للقانون بِقيـــت إتحدَّى
فتحـت عندي منطقة الغُنا الإنســَدَّ

أرُبْطو الجـانا ضامر لا كَبد ولا كرشة
سحّار الغروب جيب لي العلوق بي الورشة
نفِّصـنْ المراتب ؤطرَّحن بـي الفُرشة
داير يبـرى جرحاً في القلب مُــو خرشة

ضهـر قلعة مبـارك جيتــو تلعب شد
منعت اللســَّة* والكُرباج وقولة " هد "*
علــى التالاك إحســان رزقو ما بِنْعد
يومك كُلـّو تمصع ما انلحــق اليك حد
شَافْ ضَهَرْ أمْ سَريبة وسَوَّى قودُْوْ رحيحْ
دَهْمـَانيتُوْ جَاهَا مطبـِّق المُرّيَـــح
تَقول دِيكْ النِعـام الشاف بنات الريـِحْ
ولاّ الهَرَّبْ الممنوع بَلا تَسْريــــحْ
عَتـــُودْ الدْقَدقْ المــِنْ قَامْ نَشِيط
عصــاقيلاً تَخَلِّي الكــُور يعيِّط
تقُولبْ إيدك تقول مكنة مِخَيِّـط
بلا سِـت ريدي ما أظِنـَّك تَبَيِّـتْ
مشيت وجيت لقيت دَلُّو السلوقـيْ
يجوني الناس يِعِجُّــو يقيفُو فوقي
شاكي الغَلبـة لاكين جَدَّ شوقــي
مِتِل جمل العَلـوق كُل حين أهَوقِي


دَنَّــاىْ القَفـَاراتْ البعرف العوم
نَقضـتَ عليقْتُو بَاكرْْ بيهو قَصْدي شَيوم
كـان سَهَّل علينـا الواحد القيُّـــوم
بَشوف بُوْ الكـافي قاعِد ومِنْ وسِطْ مقسوم

لَيْ تعبنـاً مطِّولْ مِنُّو خِلاي حَابْسـُو
جِبتـُو الليلة وتْبوبَحْ ضَرَبْ فوقْ يَابْسـُو
ابو خَداً بيلْمـَع بالغضب مــُو عَابْسُو
مِتْـوطي الحِشـَمْ تُوبْ المَحامِدْ لابْسُو

****
مَرَقْ مخَلـوفْتُوْ وقَيتْ فُوقُوْ لَشَّقْ طَافـُوْ*
شَدَّيتــُو ومغَيت ســير القُشاطْ في هَافُو
عَشِيّــة رُقَادِي عِند الكامـلات اوصَافُو
افْدَعْ جِيد واهْيـف وعَاليـَات ارْدَافُو
الهضليم بعد فته
الدروك متجفل
اجدع فوق يمينك
وفي مشيك لا تسفل
مادام خالقي بي
الروح والرزق متكفل
واغل دره اليمني
المباعه مقفل


ضهر الجمعة صليتو وقلب فوق تيسى
كان مربوط يعلق فيتريت مو حميسى
تقديرى ومناى ومظنتى وقييسى
اهجمبو المسمح صورتو رب النيسى

2)
قمز من شايتو بى دلعة وسراعة وعيد
قصدو اليوم يشوف الفوقو دخل الريد
الخلا الهرع يعمل جفيل الصيد
تقيل قدمو ومشيهو ممايحة وسنيد

3)
ود العانس العالى ومسدس حوفو
قام طربان وفرقن بالهويدا كفوفو
تاتاى الفلو العزّل حميرو ودوفو
قصدو الليلة بى روح الشميشة يشوفو

4)
تقاى الدقاق جاهن رميهو شتات
مسك واسع المسافة وشارع العربات
بريبة البجازن ومهرة التابرات
اضمن عندها المرواح علوق ورباط

5)
داك شرف الخويرات الصرفتو يمينك
اسرع يا جمل وادنى السحى الما بـهينك
كان ما يدوس على هرب البطانة متينك
اضمن في المجالس ما بذكرو عنينك

6)
قال لى ضارع الفرقة المنسّل جدو
بوريك دكة الضارب الشباب لاحدو
كان تقدر على رسنى المريب شدو
بدرى الليلة "عِدُّو" بمسكك في يدو

7)
شاف عقد العبارين العوالى بدنلو
شمّم شرفهن دانالو ما طوّلو
هجيم دكة اب طعم البعيدة محلو
بعيدو قريب بعد تيس الحنو اتجفلو


ود الحورى رقّ وهتّفت نزازتو
وقّل وشاف ودى الدم قريبة عزازتو
اللهج البفوق بكرى البنونى لذاذتو
بِدنى بعيدو جملى السايقة روحو حماستو
9)
شاف سهل الحفاير ووخر العقاد
مصع المن نعال الزور قضارفو بعاد
جفيل تيس النديوة اللى الظرف ما انصاد
ساهو على البتاخد حفلة الاعياد

10)
يا الهرع النسِف صافى الحبوب علاكا
فرع السكة والردهات هويدن جاكا
على دور الظريف البى التعب اشقاكا
رهوة وريح وفارط بِتْعَب الببراكا

11)
عاصى الفوقو جاه كامل الولاية النيّل
عقب كبشو وبراهو على الجفيل اتحيّل
هجام دكة الميزانا بى الجيل ميّل
مصع واتاقا والدومات زراقن سيّل

12)
هجام السدود عقب التريعا يسدّى
كاجرنى وجفل قلع الرسن من يدّى
ما بتبارى وكتين جم قفاهو يندّى
سرعو بروق وضهرو المركب البتعدّى

13)
ود المرة والفايق جنا الشرّاد
قطع ايد الهواد المقدر العرّاد
هجام اب سلاحا لى القلب هرّاد
جمع الصى عليهو وجاهو غير ميعاد
14)
عرب الصلطة والدبّافة جاهن فايت
تعبان من جبد رسنو العملى خبايت
دناى البعيد ود العزاز وسهايت
ضمن الليلة لى السمحة وظريفة يبايت

15)
جملا "عايد الشيخ" لى حرارتو مبدّر
جَدْعِ ايديهو قطرا بى القضيب متحدر
العد اللحيمر جاهو جارى مسدر
ناطح الباسمو يطلق عقدة المتكدر

16)
عاصى البى النصر في كل مجمع فايز
فات عرب الحرازة اللى العنانيف غايز
الخلانى لافى غناى فوقك جايز
بيكا مهجم النغمات خطابو لذايذ

17)
يا الهرع الجفيلك طبعة ماك مسيوق
لِف من المبانى دربنا عارق السوق
بريب العفا المن الزوال مدروق
خلّ زراق قفاك فوق محردك مدفوق

18)
تيس حدبات قصيرة اللى المعيز هجّان
دالعا سدرو فيهو مدينة أم درمان
ست الريد فلانة الحزّما النديان
بينك وبين وصولا سراية الحفيان
19)
براوة عليك يا الهرع الجضع ماك زارق
هجم ظبى المشامشات لى رفيف البارق
السمح الجمالو على الندايد فارق
يمشى عليك من رابع سكن جاك مارق

20)
ظبى البى مهاوى الصى بياخدن توعة
باشرنى ونده شخصا يدلى اب زوعة
عاشقا نار غرامو مسببا لنا اللوعة
هجمو الناسف الضرا في السنية الجوعة
21)
يا الهرع المكملة فيك حرارة عايد
هجم سيد الجمال الليهو قلبنا رايد
ود الحورى مندوب أم وضيبا قايد
ربطو وميّزو وجابلو العلوق بى الزايد

22)
التلفونو في دولة فرنسا بكالم
جوه جلسنا في قصرو الطلوعو سلالم
الخلانى بارع في القوافى وعالم
خدو كهارب الدجن الدماسهن ظالم
أشعار طه والشلهمة
سِمحتْ ومن شنات الصيفـه لونها...اندسّا
وجبالك لبس من الخــــدار ....وإتكسى
يا المردا التليني مع الُجمال في الرسّا
فوقك زرقن الهذمي ...التكيكــو اتمسى

من قدحي البريقات ..مايقي سَقَدْ وحسّ
وقيام أخبار رحيلكم عندي مي مندسه
ما معاي حاجة من غير العضام والجثه
بي قلبي المعاكم يا حبيبي ..اتوصى

مفقود أب مرادةً في الضمير مُخْتَصة
وجرحاتو البياذن جوه ..عملن قَصَه
البسألني أهود منو .....آخذ حِصْه
لخبط كيِفْ كَيان مُخي وخَرَبلي الرَصّه

ديران الرحيل نطحن ...تكَيكْ الضُلْ
جَابن ماء وخَدَارْ قَشاً بياسع الكُـلْ
قصدنو المِلاونَاتْ ...الأرايل الحُـلْ
خَلنْ قلبي يلعب ونومي ..مابي يطُلْ

شالو الليله من دار الدَمَرْ .وإنقلو
حازما ضعينتم مِنجَمْعه ....ما بِنْفلو
سَقّد مايقي روقت الغمدة ...مابِتطلو
وقلبي مع الجُراسه البِنقُرّنْ قام كلو

اتسمحتي ........وشـــــــك نَارْ
وفوقك زَرْقَن الهَزَمي السحابو كُبارْ
شقّاقِك مَحَــا السيل انكسيتي خدارْ
وكُلْ يوم البوادي مِجددين فيك دارْ

حَنْتُوتَةً مَمَسْحه بالسيول ...فيك قَامَتْ
ورُكْبان دور تِعولِكْ يا المِمتِّعه حَامَتْ
قشِكْ بالندى مضِحي الرِزِقْ ما اتشامَطْ
تبقى مُغفَلَه العين(هن)رِضَتْ لي ونَامتْ
مسك القبلة في كوع الشمال براقِك
وقشط سدرو في عامر سحابو وساقِك
تبونك قرنن والسيل دهك شقاقِك
الضايق نشوقك حار عليهو فراقِك
******
بعد دور الجفاف قام عِفرتِك مِتباري
وسحابِك نيلتو زرقة وبرقك يلفح فاري
إتكسا بالخدار وجهك الكان عاري
وإنعقدن رواينك يام نداياً تاري
*******
نار وجهِك خلاس وأصبح عريسك باش
وسيلِك بالمعالي وبالمراتِع كاش
نفسِك من سماحتو تحلى جابلو دعاش
وعربِك لي جفافُن جبدو البرّاش
******
مبسوطة البطانة إتنعمت قدام
شابع قشها وقاسا المزرقن وقام
أخلو الدكة لا مخبر ولا حوام
ولي فيهن صديق روحاً ملاني غرام

برقك .....حسس الراقد بعد مُو نايمْ
وهَدَر رعدِك..كَجَرْ فوقو السحاب متلايمْ
سيلك دَرْدَقْ الشدر الكبـــار وهَشايمْ
وجاب الدابي فوق زبدو المِطَفِحْ عَايمْ

بِريقاتك بِلاون في السحاب..وسَهَارى
وتعّالك هَدَرْ رعدو...وصبيو اتجارى
بَاردِك خَتّّ جَامِعْ سيلو ..فُوقْ البارا
وعَوَالِيكْ اصَبَحْ إنقز بالصقايع فارا

قام تاليك مفوفي...وحزم القواره
وزكك قنب يجدع في الكبار وصغارا
عربك عاسرا اللون من تولع نارا
وقرعك لي عشاهم بالفريق اتبارى
سيارات بواديك ......قلعن دقاقن
ومن دار الدمر اتواعدن بي فراقن
وديانك رون ....ربط الزبد شقاقن
وروس قشك ...نسيسيم الهبيب ساقن

ضُلِكْ خَتّ من رَفَ السِحَابْ ...الكَوَعْ
وبراقك مَمَاسَكْ..وبالفجيج اتبوعْ
اتفقع سماك نازل...صبيبو منوعْ
وشَقّاقِك شِبِعْ في الموية لامن توعْ

قدمك يسعد الساحة الخدارها مشيط
كفلك عالى اردافك تفر وتخيط
دغمة خشمك الضحوى السحابو مبيت
التوب فى الصدر موجا مقاصر الميت

سحابك جَرّ بالقِبْلَة ......ووسامك زرّقْ
وساريتك تَكَلْ فوقها السحاب ما اتفرّقْ
مجاريك خَوّفَتْ ....حَابسْ الغَرِبْ ما شَرّقْ
وعَوَالِيكْ البِسِنْدُو عليها ...مَاهِنْ غَرّقْ

رَعَدْتِكْ كّوَعَتْ فوق الصبيب اتدلتْ
وساريتك مِزَرقّنه مي الغِبيشا الجَلَتْ
شقّاقِكْ قَبَضْ زَبَدُو وحفايرو اتملّتْ
وعربك تُوتَلَتْ فوق الضِهُورْ انسلّتْ

وحات من أنزل القرءان وفرض الحِجْ
نوحي عليهو مِتل الفاقِــدْ البِتْعِجْ
يابدر التمـام وكتين سحابتو تَفِجْ
إن وين كُنْتَ باقي..مِخلي عيني تَلِجْ






قَشِــكْ قلّعَ الدُرّابْ ...وطَــاتِه أنحَلّتْ
وفي الزَكَكْ البِشُقْ مُرياح ..سعيِتك تَلّتْ
فيك نزل اب لسانا بي قبيح ما اتفلّتْ
مِتْجَادعين بعيد ...خافو الرزق يتخلّطْ


نومي وصبري بِليّنْ والمعاهن قَلّتْ
فاقد المنو ملسوعه الفؤاد انِعَلّتْ
احسب في النجوم الطالعه والاتدلتْ
لامن عُقدَةْ الليل بي الشُعَاعْ انِحَلّتْ



رعدك سَكَّْ براقك سعيتو تَخَتِفْ
مَايِعْ عَفْرَتِكْ جاري وصبيبو يهتفْ
يا الرَيِّْكْ مِنْ الهَبّاكْ مَلُوهو تِقِطِفْ
نِيلِكْ زاد وتَبَرِكْ يا المَرِيّا بِكَتِفْ



عُقُبْ برقِكْ خَطَفْ نيلا سِحَابتو انقلّتْ
وجَاَب سحبه وصبيباً بالظلام اتْجَلّطْ
اتفقع سِحَابِكْ ريحو كاتمة وَفَلّتْ
وعَرَبِكْ يا المريه بِجَففو الانْبَلّتْ

سَحَاِبكْ جَرّ ....بالقِبْلَه وتَقِيلَه رَعّدْتِكْ
وافر ...ومن هوا الكشّاحَة مبروك خَتِكْ
البَرَدْ البِيتوَاقَعْ.........بِنّزِلو حَتِكْ
وبخيته علي الجَديّنْ يا المَرِيَه وحَدْتِكْ


نُرْتِي ......ومن شنات الصيفه سِمْحَتّ حَالِكْ
وقِدّام الضَعِينه .........اتقاصرن جَبّالِكْ
نَدّاكْ قَاْرع السَرَبْ..لا النافله مَعَقُولْ مَالِكْ
وتَبَرِكْ فُوفّى نَايِرْ .......وقَنّبْ يِلعِبْ نَالِكْ


نّاَرْ وشِك خَلاصْ واصبّح عريسك بَاشْ
وسيلك لمعاليك والمرَانِع كَاشْ
نَفَسِكْ من سَمٌومْ إتحلى جَابْ لي دُعَاشْ
وعَرَبِكْ لي جَفَافِنْ جَبَدو البرّاشْ

اتَطّمْطَمْ سَمَاكِ ............وعَاتِمْ
وبرّاقِك مَعَ فَمْ السِحابة ....يِلاطِمْ
تُعُولو اتشبكّن نازلات هواهِنْ كَاتِمْ
ووديانك لفّض مَاهِنْ...سَمَاحِك خَاتِمْ

نقـأيـبك يمحِّـنن مِحنـاً فِعالك إحـيِّــر
ومحبوب الكرام الفي البـِتحصل شـيِّـر
البـِطوي الأرض والفـوق جناحو بطيِّر
مابـلـفـّوني مـن عـهـدك بـفِـكـّو بغيِّـر

طه ود الشلهمة فوق الشيخ عبد الباقى جبل الحديد أب شام

الأمــر الصـعَـب دَرَج الفُحـول فكـّيـتـو
والقـايــل بــِقـُص دربــك كِتِـر غلـِّيتــو
القــَصَـــد إمتحــان جهلك خِجـِل ذلـِّيتو
شِـــل طعــم المِلـِح مِنّـو ومِسـِخ بلـِّيتو
المربوع دا ياود النعيم كل بيت فيهو ليهو قصة واقعة مثبتة.

شيخا ماهو زى ديل كرشو باقيه كبيرة
شيخا يلفا للضايق جوا التنيرة
شيخا يحلحل العقد الغلب تفسيرا
حرم البكازيك سيرتو ماليها سيره
شيخا ماهو زى ديل كرشو باقيه كبيرة
شيخا يلفا للضايق جوا التنيرة
شيخا يحلحل العقد الغلب تفسيرا
حرم البكازيك سيرتو ماليها سيره

نبت الغش فيك...متنوع السيقان
وعماكِ ليلى ....غطى كل مكان
روابيك .قرير.. واتسرفت خيران
عيونى بعاينن ...وبهواك مرضان