ابناء الطندب
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

مسدار المفازه ( من الطنيدبه الى بانقير)

اذهب الى الأسفل

مسدار المفازه ( من الطنيدبه الى بانقير) Empty مسدار المفازه ( من الطنيدبه الى بانقير)

مُساهمة  الجراح الثلاثاء ديسمبر 15, 2009 12:25 am

قام من المفازه التيس مدعدع خاتــر
ناطح الخلا حبرو على المفقر قاطر
خف سرعاتو تر يمناه ساهو مواتر
لي بلد المحدق وبالقبيح مابناطـــــــــر

عقب الحلتين واتدلى فوق مربوعو
بسو تقرقط الجاء من مصر في اسبوعو
بريب العفا الضارب مهاوي صقوعو
مسافتو قريبه لي المن زورو شارد كوعو

جاء خاتم اب رخم زاد الشقيق لوعاتو
زي الفوق قضيبو مطبقت ولعاتو
الخلا المعرص تالتن زوعاتــــــــو
شيوم الجازي مابين الضري وسبعاتو

تبريب والصبيري التيس عقبهن جـــاري
قلت لو بعاد بلود المانضم بي اسراري
ود خيل دنقلا الما جالسو السمساري
انت مسيبك وانا قل نوم ابصــــــــاري

زاع من الطنيدبه العرص وسمح قودو
قبض الدرب وقال داير شراب في عدودو
الخلاه عقب المله فات بي حــــــــــــــدودو
خايف من لشق صوت العنج في نهودو

هدى وخش في (عرقوب جقود الباطـــــل
جابلو زياده قطعو مدودواً مو عاطــــل
تيس القنه اسرع في هسالك ناتــــــــــــل
بعيد ياليله رد زولنا اب غراماً كاتل

باننلك جبالاً ظاهرات اسماهــــــــــــن
خبك افرقو ليش من السفر متماهــــن
شيوم القام رئيسين وبالدراوي اسقاهن
محاجمو قفاهو فوق عاج الرسن بكاهن

وصل اب رحمه والشقله الوعرها بخوف
امسى الليله لي جمع الفروق متشـــــــوف
نده خالق الجميع السني والمتصـــــــــوف
يجع شملي بي المن الدناة متعـــــــــــوف

عرق الحربه جافل صر على الشنشــــون
تقول سكران كمنقه وطالب العفيــــــــون
كان خالقنا يطلق والقواسي تهــــــــــــون
ليالي الحظ يساعدن وننظر العرجــــون

جافل العاتي لامن وخر العفريتـــــــــــــه
يصر ويطلق تقول متدرعاه شعيتـــــــه
محمودة الخصال الراسيه ماها خبيته
خلت دومتو فوق عاج الرسن حريته

جاهو البار وكركب من نسيمو انصبـــه
لامن وخر الدره وحجير الدبــــــــــــــــــه
لومني الليله كان سرجك يضوق الهبه
غير العاشقو حرحف من فراقو وغبـه

ود العيله خبك كلو سيتو تغتلــــي
واغل الريدو جوه وبره مابنفتلي
الزول اب سلاحا صاد محلات كتلي
دروبو قواسي للقوي والضعاف المتلي

وصلت ياسيدي سوكي الادبوبو الفيل
موارك كفو للعجله وجري الفي الليل
ودخيل ميرفا الجامع جمال الريـــل
خدو بيضوي خمد كهارب الليـــــل

نفس في العديد قالي وينك وينــــــــــن
براريب العفا الردن مكافي سقينـــــن
ستات الجمال الدر منو قرينـــــــــن
لاهسع مطبق فوقنا راقد دينــــــــــن

شب فوق الطوال ليهو ابقنافــــــــد بان
عديلاً قاصدو زي القابض النيشــــان
تر وقال لي غير الساكن القيـــــزان
ماخصاني عاد في اب دره والقيطان

بان لو رضيمو الليد البذكرو جراده
شب القلعه لي وادي الحمار اتبــــادى
هجيم دكة الرعنا ام وضيباً قـــــاده
خلاه يسوف وبشاش دومتو سالو قلاده

جاء خاتم البرص وصل الفرود الفاجــــر
تبقى عليهو منع الجبده لي مكاجــــــر
وصل العد وقضى اغراضو من التاجر
قت لو الليله بي درب الجميل بنهاجر

شب قلاوزه قال اتحلحل الساجــــور
مصعبي وعامبي لامن فك ضيار الكور
على الزول المحدق وبالجمال مذكــــــور
قعد يعملبي فعل الروق الطمبــــــــــور

ايد قلبوس قطعها وقالي شن بتدور
قت لو بدور لتيباً عم دراهو التور
على ديفة السلفهن دور اللشبور
جزم ياسيدي الا الليله اوريك جور

كبه قفاهو فوق فقار هسالو مســـــود
عرق عظمي قنب في خبيبو يذود
متين ياربي لي بلد البريدو نعـــود
اشوف المن فراقن عقلي ديمه مهود

داك دور البريدن كلو طار قدامـــك
جزم ياعاصي تثبت دونو اقلو مقامك
بعد التعبه والرق الظهر في حزامـــك
ابقى الليله ناويين بالعدل حكامــــــــــك


خرت القده واتبادالي فيهو جنـــــــــون
لامن وخر المسميه بي ام ميمـــــــون
قالي ضراعي راكز لي الرحيم مابخون
عيب اشنابي كان غير عاشقي ارقد دون

عبلوج الثرى العنفن جداولو مجـــــــــــرق
وين الخلا ياتيس جم قفـــــــــال مــــــــــزرق
قود الخب واسرع لي جريدك فــــــــــــرق
انت مسيبـك وانا جوفي ذادو تحــــــــرق

ضرعاتك متل مكن النصارى العبــــــــــــــه
دوماتك بشيشن فوق محادرك كبــــــــــــــه
المرض الاصابني وفي فوادي اتربــــى
غير كزيم براطم اللينه مابنطبـــــــــــه

الليله العبد فوق البانقيــر هكـــــــــع
وصل السمره قنب بالرمال اتسكع
الخلاني تارك الفرض وابيت اتركع
نيتي وغرضي اهجمو البي الفلير اتلكع

بان ليهو العريض غز في المحندد شافو
عدل الخب وتيس القنه تر مقدافـــــــــــــو
على هجوم السحي الهضليمو غطى اطرافو
جمع الكور مصبح كلو فوق اكتافــــــــــو

كورك فوق سنابك منصت بي غردك
يالصايع المصوص وديمه تارك فرضك
شيوم اللحه دوفك وقل حياك وعرضك
ترا الخلاك مجافي السوط وزايع برضك

برد بالسلام خلي اللقولو حبابــــــــــــك
انظر حافلاً مافيش براه من جابــــك
هو بقولي ات ياسيدي وين اطباك
قت لو الليل تشوف لعب التياترو عتابك

كرب شمامتو سالو تشمره وعقاطـــه
خايف الشوره من مصر ينطلق سقاطه
ست ريدي الوضيبها بغلب المشاطــه
سبعين خلقه فوق السته صايع ساطه

الخلاني كل يوماً بعبي شديدك
فاجراً بدني صي نقع البعيد عريدك
بعد قربت لي المنع الوسن من سيدك
اقدل وتاتي اثبت من كراكبك وقيدك

اب قمبيل وصلتو وفيك بدنلي غرايب
ايديك جمعن نقع الفيافي طرايب
عند العمرو ماضاق اتهم بي صعايب
انت تبيت حظوظ وانا بتلقن لي طبايب

منك راح تعب سكه ووهط تبطيــــــــــلو
واتنشق لي عاشقي المقرن تيلـــــــــــو
سيدك يبري من فرق البردلو غسيلــــو
ارتج الجسم والعضم عدو راتيلـــو

سلامك ردو ليهو اللي الادب مو لاغي
خليه يقول وسهلن بي المحنه بشاقي
ياتيس قنة الصي المقايس الراقـــــــي
هادا العهدو راسخ وعندو خات ميثاقي

كان حاسب رغوتك يا ابني شيلة جره
قبل البركه كان ندي السلام من بره
مرق الحاكم المنو الجيوش منصـــره
دبورة ومقص تاج خايله فوقو الزره

بي لفظة ادب قال لي جوه اتفضــــل
ماطفر وانطلق قام بالفراغ اتقــــــدل
الخلاني ياخلاي جناني مبــــــــدل
شفت كتفو المهدل من وضيبو اتهدل

جدع مسداري فوق سيد ريدي غير مزمل
ووصفو يمتع الغناي قدر مايكمــــــــل
المبروعو قاد اهلي قصـــارو مغمــــل
حوى (يس)و(عمى) وسورة (المزمل)

والسلام عليكم
مع تحيات
انور الجراح[/b][/size][/font][/sub][/color][/code][/size][/justify][/center][/size]
الجراح
الجراح

المساهمات : 36
تاريخ التسجيل : 26/11/2009

الرجوع الى أعلى الصفحة اذهب الى الأسفل

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى